बाराको पथलैयाबाट १२ किलो लागु औषध गाँजा सहित ३ जना पक्राउ
चेरवन्त खबर डेस्क
बारा जिल्लाको पथलैयाबाट १२ किलो लागु औषध गाँजा सहित ३ जनालाई प्रहरीले पक्राउ गरेको छ । सो जिल्लाको जितपुर सिमरा उपमहानगरपालिका वडा नम्बर १ पथलैया चोकबाट प्रहरी चौकी पथलैयाबाट खटिएको टोलीले प्रतिबन्धित गाँजा बरामद गरेको हो ।
अमलेखगञ्जबाट पथलैयातर्फ आउँदै गरेको ना २ ह ४९५० नम्बरको अटो भाग्ने क्रममा चेकिङ्गमा खटिएको प्रहरी टोलीले उक्त अटोलाई पछ्याउँदै नियन्त्रणमा लिएको जिल्ला प्रहरी कार्यालय बाराका जिल्ला प्रहरी प्रमुख उपरिक्षक होबिन्द्र बोगटीले जानकारी दिनु भयो । वहाँका अनुसार प्रहरीले अटो चेकजाँच गर्ने क्रममा लुकाई छिपाई ल्याइरहेको १२ किलोग्राम अवैध लागुऔषध गाँजा फेला पारेका हुन् ।
लागुऔषध गाँजा सहित सोही उपमहानगरपालिका वडा नम्बर २२ चकरी निवासी २५ वर्षीय नरेश बमको साथ साथै ३५ वर्षीय सुरेश स्याङ्तान र ४३ वर्षीय हिरामान थिङ्लाई पक्राउ गरेको पनि वहाँले बताउनु भयो । उनीहरुविरुद्ध लागु औषध सम्बन्धी कसुरमा आवश्यक अनुसन्धान भइरहेको प्रहरी उपरिक्षक बोगटीले जानकारी दिनु भयो ।