कलैया । बाराको सदरमुकाम कलैयामा खसीको मासुको नयाँ मूल्य निर्धारण गरिएको छ। बजारमा मासुको मूल्यमा एकरूपता कायम गरी उपभोक्तालाई राहत दिने उद्देश्यले बारा उद्योग वाणिज्य संघ ले नयाँ दररेट सार्वजनिक गरेको हो।

संघका वाणिज्य उपाध्यक्ष प्रदीप कुमार साह (गोल्डेन) को अध्यक्षतामा आइतबार बसेको बैठकले स्थानीय मासु व्यवसायीहरूसँग छलफल गरेर नयाँ मूल्य समायोजनको निर्णय गरेको जनाएको छ।

निर्णयअनुसार छालासहितको खसीको मासु प्रतिकिलो १ हजार ५० रुपैयाँ तथा छाला नभएको खसीको मासु प्रतिकिलो १ हजार १ सय रुपैयाँ कायम गरिएको छ। संघले यो निर्णय तत्काल लागू हुने जनाएको छ।

साथै, निर्धारण गरिएको मूल्यसूची पूर्ण रूपमा पालना गर्न सबै मासु व्यवसायीलाई निर्देशन दिइएको छ। तोकिएको दररेटमै उपभोक्तालाई मासु बिक्री गर्न आग्रह गर्दै संघले बजार अनुगमनलाई थप प्रभावकारी बनाउने बताएको छ।