कलैया । बाराको कलैयामा आज बसेको जिल्ला खोप समन्वय समितिको अभिमुखीकरण बैठकले हैजा रोगको महामारी विरुद्ध प्रतिकार्य खोप अभियान, २०८२ सञ्चालन गर्ने महत्त्वपूर्ण निर्णय गरेको छ।
जिल्ला समन्वय समितिका अध्यक्ष नरेन्द्र सहको सभापतित्वमा बसेको बैठकले बारा जिल्लाका कलैया उपमहानगरपालिका, जितपुर सिमरा उपमहानगरपालिका, प्रसौनी गाउँपालिका, परवानीपुर गाउँपालिका, फेटा गाउँपालिका र विश्रामपुर गाउँपालिका गरी ६ वटा स्थानीय तहमा असोज २७ गतेदेखि कार्तिक २ गतेसम्म अभियानको रूपमा खोप सञ्चालन गर्ने निर्णय गरेको हो।
अभियान अन्तर्गत एक वर्षभन्दा माथिका सम्पूर्ण जनसङ्ख्यालाई शतप्रतिशत खोप खुवाइनेछ। खोपलाई सहज बनाउन सम्पूर्ण शिक्षण संस्था, सरकारी तथा गैरसरकारी कार्यालय, वित्तीय संस्था, सुरक्षाकर्मी रहने स्थान, कलकारखाना, बसपार्क, सीमा नाका र आवश्यक स्थानहरूमा खोप केन्द्रहरू स्थापना गरिनेछ।
यस कार्यमा सहयोग गर्न तथा बिना अवरोध खोप खुवाउन अनुरोध गरिएको छ। स्थानीय स्तरमा माइकिङका साथै विभिन्न संस्था र धार्मिक स्थलहरूबाट समेत प्रचारप्रसार गरिनेछ। खोप अभियानको अवधिमा कुनै पनि शिक्षण संस्था बन्द नगर्न स्थानीय तह तथा शिक्षा विकास एकाइ मार्फत समन्वय गरिनेछ र अभियानको दैनिक प्रतिवेदन स्थानीय तहले स्वास्थ्य कार्यालयलाई बुझाउनु पर्नेछ।
बैठकमा प्रमुख जिल्ला अधिकारी प्रकाश पौडेलले हैजाविरुद्धको खोप जीवन उपयोगी भएकोले कुनै दुविधा नमानी खोप लिन जोड दिए भने जनस्वास्थ्य कार्यालय बाराका निमित्त कार्यालय प्रमुख राम नरेश यादवले खोपको प्रभावकारिता बारे जानकारी गराएका थिए।
यस्तै, पत्रकार महासङ्घ बाराका अध्यक्ष रमेश सुवेदीले समुदायमा खोप सम्बन्धी जनचेतना फैलाउन सञ्चारको सबै माध्यम अपनाउन सुझाव दिएका थिए। बैठकमा सशस्त्र प्रहरीका एसपी खुम केसी लगायतको पनि उपस्थिति रहेको थियो। सुरक्षा निकायहरूले खोप अभियानमा शान्ति सुरक्षा प्रदान गर्ने र समुदायलाई सहभागी हुन अपिल गर्ने निर्णय पनि भएको छ।
