काठमाडौं । सञ्चार तथा सूचना प्रविधि मन्त्री जगदिश खरेलले सामाजिक संजालमार्फत आतंक मच्चाउने ढंगले प्रवाह भइरहेका फेक कन्टेन्टहरुको नियम र नियन्त्रणमा प्रेस काउन्सिललाई सशक्त बन्न सुझाएका छन् ।
प्रेस काउन्सिल नेपालको भ्रमणमा गएका मन्त्री खरेलले आवश्यक जनशक्ति थपेर टास्क फोर्स नै गठन गरेर भने पनि फेक कन्टेन्टहरुको नियमन गर्नुपर्ने बताए।
मन्त्री खरेलले भने, ‘के भयो भने यो विकृति र विसंगतिलाई अनुगमन, नियमन र कानूनको दायरमा ल्याउन सक्छौं रु यसबारे काउन्सिलले भनोस् । अहिले २० हजार वटा सोसल मिडियाका प्लेटफर्महरु सन्चारमाध्यमार्फत सन्चालित छन्। अधिकांश आउट अफ ट्र्याक गएका हुन् कि भन्ने पनि देखिन्छ । सामाजिक संजालमा हेर्यो भने हुँदै नभएका एआइ जेनेरेटेड कन्टेटहरुले मान्छेलाई भ्रमित बनाइरहेको छ । गलत नहोस भन्नका लागि हामी अनुगमन,नियमन र कारवाहीको दायरमा ल्याउन गम्भीर बन्नुपर्छ ।’
अहिलेको सरकार ६ महिनाका लागि आएकाले लोकरिझ्याइका लागि काम नगर्ने भन्दै मन्त्री खरेलले प्रेस काउन्सिलले स्वायत्त र स्वतन्त्र ढंगले काम गर्नुपर्ने बताए ।
मन्त्री खरेलले नागरिकले प्रयोग गर्ने व्यक्तिगत सामाजिक संजालका प्लेटफर्महरुको अनुगमन राज्यका अरु निकायले गर्ने र कारवाहीको दायरामा ल्याउने भन्दै काउन्सिलले मिडियाले चलाउने सामाजिक संजालको अनुगमन,नियमन र कारवाही गर्नुपर्ने बताए । उनले यसका लागि एक साताभित्र काम गर्न पनि निर्देशन दिए । समाचार नेपाल प्रेसबाट
