कलैया । तराई–मधेश क्षेत्रमा यतिबेला मौसम कुहिरो र हुस्सुले ढाकिए पनि प्रतिनिधि सभा निर्वाचनको माहोल भने दिनानुदिन तातिँदै गएको छ। यही चुनावी सक्रियताबीच बारा निर्वाचन क्षेत्र नं. ३ का उम्मेदवार इन्जिनियर अरविन्द साह मतदाताको घरदैलोमा निरन्तर पुगिरहेका छन्।
राष्ट्रिय स्वतन्त्र पार्टी (रास्वपा) का तर्फबाट उम्मेदवार रहेका साह सोमबार बिहान कलैया उपमहानगरपालिका–१८ मंगढवामा पुगेर स्थानीयसँग प्रत्यक्ष संवादमा जुटे। मतदातासँग भेटघाट गर्दै उनले आफूलाई व्यवहारिक काम गर्ने प्रतिनिधिका रूपमा अघि बढाउने प्रतिबद्धता व्यक्त गरे। “म यही समाजको सदस्य र तपाईँहरूकै छोराजस्तै हुँ। विकासका कुरा कागजमा मात्र होइन, व्यवहारमा देखाउने लक्ष्य छ,” उनले मतदातासँग भने।
घरदैलो कार्यक्रमका क्रममा साहले अव्यावहारिक वाचा भन्दा पनि दैनिक जीवनसँग गाँसिएका समस्यामा केन्द्रित भएर काम गर्ने धारणा राख्दै आएका छन्। शिक्षा, स्वास्थ्य, सडक पूर्वाधार सुधार र युवाका लागि रोजगारी सिर्जनालाई प्राथमिकतामा राख्ने उनले बताए। प्रतिनिधि सभाको भूमिकाअनुसार नीतिगत सुधार र संरचनागत समस्याको समाधानका लागि सक्रिय रहने उनको योजना छ।
यसअघि पनि साहले क्षेत्र नं. ३ का जितपुर, कलैया लगायतका स्थानमा घरदैलो, युवा छलफल र समुदायस्तरीय अन्तरक्रिया कार्यक्रम सञ्चालन गरिसकेका छन्। मतदाताको सुझावलाई प्राथमिकता दिँदै नीति निर्माणमा आवाज उठाउने आफ्नो कार्यशैली रहने उनले दोहोर्याए।
चुनावी अभियानसँगै मतदातासँग प्रत्यक्ष सम्बन्ध विस्तार गर्ने साहको प्रयासले क्षेत्र नं. ३ मा चुनावी गतिविधि थप सक्रिय बनेको स्थानीयले बताएका छन्।
