ग्रीनसिटीद्वारा मकालु चोकमा स्पिड ब्रेकर जडान
वीरगंज, २४ फागुन ।
पर्सा जिल्लाको बिरगंज महानगरपालिका अन्तर्गत ग्रीनसिटी सामुदायिक सेवा केन्द्र आदर्शनगरले शनिबार वीरगञ्जको मकालु चोकमा स्पिड ब्रेकर जडान गरेको छ ।
तिव्र गतिमा चल्ने सवारी साधनलाई गति सिमित गर्न र बढीरहेको दुर्घटनालाई नियन्त्रण गर्ने अभिप्रायले समाजसेवी पवन कुमार रुंगटाको सहयोगमा आधुनिक स्पिड ब्रेकर जडान गरिएको सामुदायिक सेवा केन्द्रका अध्यक्ष जयप्रकाश खेतानले बताउनुभयो ।
सो अवसरमा वडा प्रहरी कार्यालय बिर्ताका प्रहरी निरिक्षक निर्मल पनेरु, वीरगञ्ज युथ राउण्ड टेबल १३, ग्रीनसिटी सामुदायिक सेवा केन्द्रका पदाधिकारी, सुरक्षाकर्मी, सञ्चारकर्मी लगायतको सहभागिता रहेको थियो ।
यसअघि आदर्शनगरको चोकमा पनि सेवा केन्द्रले नै स्पिड ब्रेकर जडान गरेको थियो । आदर्शनगर चोकमा जडान गरिएका ब्रेकरले दुर्घटना न्युनिकरणमा महत्वपुर्ण भुमिका निर्वाह गरेको ट्राफिक प्रहरीले जनाएको छ ।