रौतहट जिल्लाको मंगलपुरमा गएराती एक जना युवकको हत्या
चेरवन्त खबर डेस्क
रौतहट जिल्लाको मंगलपुरमा गएराती एक जना युवकको हत्या भएको छ । हत्या भएका ब्याक्ति चन्दपुर नगरपालिका वडा नम्बर १ मंगलपुर निवासी २८ वर्षीय गोपाल थिङ्ग रहेका हुन् । उनलाई घरको झ्यालमा प्रयोग गर्ने सिसाले काटेर हत्या गरेको खुलेको छ ।
थिङ्गको हत्या गरेको आशंकामा ईलाका प्रहरी कार्यालय चन्द्रनिगाहपुरले तीन जनालाई पक्राउ गरेका छन्। पक्राउ पर्नेमा सोही स्थानका बासिन्दा ३५ वर्षीय रबिन्द्र थिङ्ग, उनकै माइजू नातामा पर्ने ४२ वर्षीय बुद्धिमाया पाख्रिन, र काठमाडौं घर भई १ हप्ता पहिले देखिन आफन्त भेट्न आएका निजको मामा नाता पर्ने ३९ वर्षीय आशिष पाख्रिन रहेका छन् ।
उनीहरूले मादक पदार्थ सेवन गरी कुटपिट गर्दा घरको झ्यालमा प्रयोग गर्ने सिसाले काटेर हत्या भएको प्रहरीको प्रारम्भिक अनुसन्धानमा खुलेको र घटनाबारे थप अनुसन्धान भइरहेको प्रहरी कार्यालय चन्द्रनिगाहपुरका प्रहरी निरीक्षक अरविन्द कुमार साहले बताए ।