१७ जना संक्रमित थपिएपछि वीरगञ्जमा ७ सय जनाको परीक्षण हुँदै
बुधबार वीरगञ्जको छपकैयाका एकै परिवारका १७ जना सदस्यमा कोरोनाभाइरसको संक्रमण देखिएपछि अहिले उक्त बस्तीका थप ७ सय जनाको परीक्षण गर्ने तयारी गरिएको छ।
वीरगञ्ज महानगरपालिकाका मेयर विजयकुमार सरावगीले ९ सय वटा किटको व्यवस्था भएको र सकभर आजैदेखि परीक्षणको काम सुरू गरिने बताए।
‘काठमाडौंबाट ४ सय र नेपाली सेनाबाट ५ सय किट आएको छ। आज वा भोलिबाटै स्वाब संकलनको काम सुरू गर्छौं,’ उनले भने।
९ सय किटमध्ये २ सय किट आपत्तकालीन अवस्थाको लागि राख्ने महानगरले जनाएको छ।
स्वाब संकलनमा महानगर र नारायणी अस्पतालका स्वास्थ्यकर्मी खटिनेछन्।
संक्रमित संख्या बढ्दै गएपछि छपकैया बस्ती उच्च जोखिममा रहेको छ।
गत आइतबार एक जना ३६ वर्षीय पुरूषलाई संक्रमण देखिएदेखि नै सो क्षेत्र सिल गरिएको छ। अहिले पनि सो क्षेत्र सुरक्षाकर्मीको निगरानीमा छ।
मेयर सरावगीले बस्तीमा बढेको जोखिम हेर्दा झन्डै पाँच हजार व्यक्तिको परीक्षण गर्नुपर्ने बताए।
‘हाम्रो योजना भनेको कम्तीमा पाँच हजार व्यक्तिको परीक्षण गर्ने भन्ने हो। तर किट अभावका कारण परीक्षण गर्न सकिएको छैन,’ उनले भने।
अहिले देशभर रहेको प्रयोगशालाहरूमा किट अभाव रहेको छ। जसमा चार वटा प्रयोगशालामा किट नभएकै कारण कोरोना परीक्षण रोकिएको छ।
स्वास्थ्य मन्त्रालयले पनि पछिल्लो समय किट अभाव हुँदा परीक्षणको गति सुस्त भएको जनाएको छ। तर केही दिनमै किट आउने र परीक्षण पहिलेकै गतिमा अघि बढ्ने मन्त्रालयका प्रवक्ता डा. विकास देवकोटाले बताए। सेतो पाटिबाट सभार