कलैया । बारा जिल्लाको एक बिद्यालयले गरिब तथा दलित बिद्यार्थीको पढाईका लागि १०० रुपैया सहयोग अभियान ल्याएको छ । करैयामाई गाउँपालिका वडा नम्बर ५ स्थित श्री नेपाल राष्ट्रिय आधारभुत बिद्यालय तेतरियाका प्रधानाध्यापक गोपाल चौधरीले सो अभियान ल्याएको जानकारी प्राप्त भएको हो ।
चौधरीका अनुसार विद्यालय भौतिक रुपमा केही ठिकै भएपनि आर्थिक रूपमा एकदमै कमजोर रहेको छ । विद्यालयमा करिब ३५० जना विद्यार्थी भाइबहिनीहरु अध्ययनरत छन। करिब ५० प्रतिशत विद्यार्थीहरु दलित समुदायबाट र ५० प्रतिशत विद्यार्थीहरु अन्य समुदायबाट रहेका छन् । विद्यालयमा पढ्न आउने विद्यार्थीहरु प्रायः गरिब,दलित,विपन्न र असहाय परिवारका रहेका छन। तिनै गरिब, दलित,विपन्न र असहाय बालबालिकाहरुको शैक्षिक उनन्यनको लागि केही गरौं भन्ने उदेश्यले १०० रुपैया सहयोग अभियान संचालन गरिएको छ ।
उक्त अभियान मार्फत आएको सहयोगले ती बालबालिकाहरुको शैक्षिक उन्नयनमा एउटा ईटा थप्ने काम हुनेछ र उनीहरुको एउटा असल भविष्य निर्माणमा सहयोग पुग्नेछ भन्ने आशा लिएको प्रधानाध्यापक चौधरीको कथन रहेको छ । जाडो मौसममा बालबालिका लागि न्यानो कपडा पनि सहयोग गर्न संघ संस्थालाई अपिल गरिएको छ । सहयोग गरिएका दाताहरुको नाम बिभिन्न माध्यमबाट सुचिकरण गरिने प्रतिबद्धता जनाउदै बिशेष सम्मानको व्यवस्था पनि रहेको बताएका छन् । सहयोगीहरुका लागि सहयोग सम्बन्धि जानकारीका लागि ९८४५७८४१२० नम्बरको मोबाइलमा सम्पर्क गर्न अनुरोध गरिएको जनाएको छ । 
