कलैया । राष्ट्रिय स्वतन्त्र पार्टी जिल्ला कार्यसमिति बाराले भदौ २३ र २४ गते जेनजीले गरेको प्रदर्शनको नाममा हिंसात्मक कार्य गर्नेलाई अनुसन्धान गरि कारवाही प्रकृया अगाडि बढाउन माग गर्दै एक बिज्ञप्ति जारी गरेका छन् ।
सो पार्टीका बारा जिल्ला सभापति चन्दन कुमार स्वर्णकारले आफ्नो हस्ताक्षर गरिएको बिज्ञप्ति बिहीवार सार्वजनिक गरेका हुन ।
बिज्ञप्ति यस प्रकार रहेको छ ।
कुनै पनि नेपाली नागरिकको एकथोपा रगत पनि नबगाई शान्तिपुर्ण तवरबाट संविधान बमोजिम निर्माण भएको राष्ट्रिय स्वतन्त्र पार्टी कुनै पनि अवस्थामा हिंसा, लुटपाट एवम् आगजनी लगायतका कुनै पनि अपराधिक एवम् ध्वंसात्मक कार्यलाई किमार्थ स्वीकार गर्दैन। साथै त्यस्ता कार्यमा संलग्न हुनेहरूको पक्षपोषण समेत गर्दैन। कुनैपनि आन्दोलनको बहानामा हिंसात्मक वा ध्वंसात्मक गतिविधि, लुटपाट एवम् आगजनी हुनु राम्रो होइन्। यस्ता अपराधिक गतिविधिको सिकार हुनुभएका सम्पुर्णको पक्षमा हाम्रो सहानुभूति र साथ छ।
गत भाद्र २३ र २४ को जेन्जी आन्दोलनका कारण देशमा उत्पन्न परिस्थिति पश्चात उक्त घटनाको सन्दर्भमा सत्यतथ्य छानविनका लागि सरकारले पुर्व न्यायाधीश गौरी बहादुर कार्कीको नेतृत्वमा ३ सदस्यीय छानविन समिति गठन गरेको तथ्य सर्वविदितै छ। भाद्र २३ गतेको नरसंहार र २४ गतेको तोडफोड,लुटपाट एवम् आगजनी दुबै घटना आमनेपाली जनसमुदायको लागि निकै पिडादायी र नमिठो स्मरणको रुपमा रहेको हुँदा उक्त दुबै घटनामा संलग्न जोकोहीलाई तथ्य प्रमाणको आधारमा कानुनी दायरामा ल्याई कडा कारबाही गर्नुपर्छ भन्ने पक्षमा राष्ट्रिय स्वतन्त्र पार्टी बारा सुरुदेखि नै स्पष्ट छ। त्यसैले भाद्र २४ गतेको घटनापश्चात् राजनीतिक प्रतिसोधको लागि निरन्तर रुपमा मिथ्या आरोप,शंका वा राजनितिक लाभहानीको बलमा राष्ट्रिय स्वतन्त्र पार्टीलाई उक्त घटनासँग जोडेर बदनाम गराउने कार्य भएकोप्रति हाम्रो गम्भिर ध्यानाकर्षण भएको छ।
हामीले यसअगाडि पनि सम्बन्धित सरकारी संयन्त्रलाई भाद्र २३ र २४ को घटनासँग सम्बन्धित तथ्य र प्रमाणको आधारमा हुने अनुसन्धान, जाँचबुझ एवम् कानुनी प्रक्रियामा पुर्ण सहयोग र समर्थन रहने प्रतिबद्धता व्यक्त गरिसकेका छौं। सुरुवात देखि नै संस्थागत रुपमा यस्ता घटनामा हाम्रो समर्थन र सहभागिता नरहेको तथा व्यक्तिगत रूपमा रास्वपाका कुनै सदस्य त्यस्ता कार्यमा संलग्न रहेको पाइएमा आवश्यक कारबाहीका लागि सहजीकरण गर्ने समेत सम्बन्धित सम्पूर्णमा जानकारी गराउँदछौ। साथै छानविन समितिले समेत भाद्र २४ को अपराधिक घटनामा संलग्नलाई कारबाही गर्न आयोगको प्रतिवेदन कुर्न नपर्ने जानकारी गराएको अवस्थामा सम्बन्धित पक्षले यसमा आवश्यक तदारुकता समेत देखाउनु पर्नेमा राष्ट्रिय स्वतन्त्र पार्टी बारा स्पष्ट छ।
