कलैया : बारा जिल्लाको देवताल गाउँपालिका वडा नम्बर ७ स्थित बेनौली चौकमा संचालित तीन वटा पसलमा हिजो राती आगलागी हुँदा २ लाख १३ हजार बराबरको सामाग्री जलेर नष्ट भएको छ।
बिहीबार राति सो चौकमा रहेको बिनोद साहको घर र गुम्ती पसल भाडामा लिई बस्ने ललन महतोले संचालन गरेको नास्ता पसलमा अचानक आगलागी हुँदा लाखौंको क्षती भएको हो।
जिल्ला प्रहरी कार्यालय बाराका अनुसार उक्त आगलागीले महतोको नास्ता पसलमा रहेको ग्यास सिलिन्डर २ थान, ग्यास चुलो २ थान, २ कार्टुन अण्डा, बेन्च र टेवल सिलिङ फ्यान, चिउरा भुजा गरी १ लाख ४८ हजार बराबरको क्षति छ।
सो आगलागीमा स्थानिय जमुन ठाकुरको सैलुन पूर्ण रुपमा जली ३० हजार रुपैयाँ बराबरको क्षति भएको जानकारी प्राप्त भएको छ भने सोही ठाउँमा वस्ने भोज मियाको मासु पसलको घुम्ती र बिभिन्न सर–सामानहरु गरी ३५ हजार बराबरकोे क्षति भएको बताइएको छ।
अस्थायी प्रहरी पोष्ट बेनौली बाट प्रहरी सहायक निरीक्षकको कमाण्डमा टोली खटि गई दमकल,प्रहरी र स्थानीयको सहयोगमा आगोलाई पूर्ण रुपमा नियन्त्रणमा लिइएको थियो। उक्त आगलागीबाट कुनै किसिमको मानविय तथा जिव जनावरको क्षती नभएको प्रहरीको कथन रहेको छ।
