कलैया । बाराको सिमानाकाबाट तस्करी हुने व्यापक जनगुनासोको आधारमा शुक्रबार देखि प्रमुख जिल्ला अधिकारी बसन्त अधिकारीको नेतृत्वमा तिनै सुरक्षा निकायको टोलि सहित सिमानाकाको अनुगमन शुरु गरिएको छ।
उक्त अनुगमनलाई अभियानको रुपमा नै सँचालन हुने बताउदै प्रजिअ अधिकारीले शुक्रबार बाराको सिम्रौनगढ स्थित कचोर्वाबाट गरीएको जानकारी समेत प्रजिअ अधिकारीले दिएका छन्।
प्रजिअ अधिकारीले सामान्य जनताका लागि किनमेल तथा आवागमनमा कुनै अवरोध नहुने भए पनि तस्करी नियन्त्रणमा कुनै सम्झौता नगर्ने स्पष्ट पारेका छन्।
यसअघि बिहीबार तस्करी भइरहेको सूचनाका आधारमा मटिअर्वा नाकामा अनुगमन गर्ने क्रममा अवैध रूपमा सामान तस्करी भइरहेको खुलेको थियो। घटनास्थलमा नेपाल प्रहरी र सशस्त्र प्रहरीका एक(एक जना जवान ड्युटीमा खटिएका थिए। तर, तस्करी नियन्त्रण नगरेको भन्दै प्रजिअ अधिकारीले दुवै प्रहरी जवानलाई तुरुन्तै निलम्बन गर्ने आदेश नै दिएका थिए।
प्रजिअ बसन्त अधिकारीले जिल्लाभर तस्करी नियन्त्रण, शान्ति सुरक्षा र सीमा नाकामा गैरकानुनी गतिविधि रोकथामलाई प्राथमिकता दिने बताएका छन्। साथै, कानून कार्यान्वयनमा कुनै सम्झौता नगरिने चेतावनीसमेत दिएका छन्।
उनले अनुगमनका क्रममा अवैध गतिविधिहरूमा संलग्न व्यक्तिहरूमाथि कडा कारबाही गर्ने र सीमा नाकाहरूको सुरक्षामा थप कडाइ गरिने बताएका छन्। बारा जिल्लामा तस्करी नियन्त्रण र शान्ति सुरक्षाको सुनिश्चितता गर्न अनुगमन अभियानलाई निरन्तरता दिइने जनाइएको छ।
