प्लाष्टिकजन्य फूल तथा गुच्छा आयातमा कडाइ, बिक्री गरेको पाइए कारबाही हुने
3 
0 
निराज रानाभाट, काठमाडौं ।
सरकारले प्लाष्टिकजन्य फूल तथा गुच्छा बिक्री रवितरणमा कडाइ गर्ने भएको छ । आयात वा बिक्री र वितरण गरिएको पाइएमा वातावरण संरक्षण ऐन २०७६ अनुसार कारबाही गरिने भएको हो ।
वन तथा वातावरण मन्त्रालयले वातावरण संरक्षण ऐन २०७६ को दफा १५ को उपदफा ९ ६ ० ले दिएको अधिकार प्रयोग गरी वि।सं। २०७९ साउन १२ गतेमा नेपाल राजपत्रमा सूचना प्रकाशित गरी नेपालभर प्लाष्टिक जन्य फूल तथा गुच्छाको उत्पादन, आयात, बिक्री र वितरण वा भण्डारण गर्न पूर्ण रुपमा रोक लगाएको थियो । सरकारको नियम पालना गर्न फ्लोरिकचर एसोसिएसन नेपाल ( फ्यान ) ले सघाउने भएको छ ।
गृह मन्त्रालयमा पुष्प व्यवसायी र सरोकारवालाबीच संयुक्त बैठक बसेर प्लाष्टिकजन्य फूल तथा गुच्छा लगायतको बिक्री र वितरण रोक्न सबै पक्षले कडाइकासाथ काम गर्ने निर्णय भएको हो । गृह मन्त्रालयका सह – सचिवको संयोगकत्वमा गृह मन्त्रालय, कृषि तथा पशुपंछी विकास मन्त्रालय, उद्योग वाणिज्य तथा आपुर्ति मन्त्रालय, नेपाल प्रहरी, शसस्त्र प्रहरी बल, राष्ट्रिय अनुसन्धान विभाग तथा प्रतिनिधिहरु छलफल भएको हो । छलफलले प्लाष्टिकजन्य फूल तथा गुच्छा बिक्री र वितरणमा सम्बन्धित सरकारी निकायबाट कडाइका साथ अनुगमन हुने र प्लाष्टिकजन्य फूल तथा गुच्छाहरु बिक्री र वितरण, भण्डारण र आयात गरेको पाइएमा नियमानुसार कारबाही गर्ने निर्णय गरेको छ ।
अवैध रुपमा आयात हुने फूल, माला, तथा माटो सहितको बोट बिरुवाहरु सबै भन्सार नाकाहरुमा नेपाल प्रहरी, शसस्त्र प्रहरी बल, राष्ट्रिय अनुसन्धान विभाग लगायतका सम्बन्धित निकायहरुबाट रोक लगाउने निर्णय भएको छ । उद्योग, वाणिज्य तथा आपुर्ति मन्त्रालयबाट एकिकृत बजार अनुगमन गर्ने र कानुन बिपरित बिक्री र वितरण गरेको पाइएमा नियमानुसार कारबाही गरिने भएको छ । सबै भन्सार नाकाहरुमा रहेको प्लान्ट क्वारेन्टाईन तथा विषादी व्यवस्थापन कार्यालयहरुलाई थप प्रभावकारी बनाइने भएको छ ।
चाडपर्वको मौका छोपी बजारमा कृतिम अभाव सृजना गरी कालो बजारी गरेको पाइएमा कानुन अनुसार कारबाही गरिने गृह मन्त्रालयले जनाएको छ । फ्यानले प्रेस विज्ञप्ति जारी गर्दै बैठकको निर्णय बारे जानकारी गराएको छ । ‘सदस्य पुष्प व्यवसायीज्यूहरुले आजकै मिति देखि कृतिम प्लाष्टिक जन्य फुल गुच्छा तथा बिरुवाहरुको बिक्री वितरण नगर्न नगराउन अनुरोध गर्दछौ । 
नेपाल सरकारको सम्बन्धित निकायबाट अनुगमन गर्ने क्रममा भण्डारण तथा बिक्री बितरण गरेको पाईएमा कानुन अनुसार कारबाही हुने समेत यसै प्रेस बिज्ञप्ती मार्फत जानकारी गराउदछौ । फ्यान सदस्य पुष्प व्यवसायीज्यूहरुले व्यवसायीक कारोबार गर्दा वैधानिक तवरले प्राकृतिक फूल बिरुवाहरुलाई प्राथमिकता दिई व्यवसाय गर्न समेत हार्दिक अनुरोध गर्दछौं,’ विज्ञप्तिमा भनिएको छ ।
