तराईमा बिशेष मनाईने छठ पर्व आजदेखि विधिवत रूपमा सुरु
चेरवन्त खबर डेस्क
तराईको सबैभन्दा ठूलो पर्व छठ शुक्रबार देखि विधिवत रूपमा सुरु भएको छ । मरुवा, मसुराको दाललगायत प्याज लसुन शुक्रबारदेखि पर्व सम्पन्न नभएसम्म त्याग गर्नुपर्छ ।
तराई मधेसमा चार दिनसम्म मनाउने छठको पहिलो दिन जीउ शुद्ध गर्न नुहाउने दिन हो– जसलाई तराईमा ‘नहाय–खाए’ भनिन्छ । छठका व्रतालुहरू नुहाएर ‘अरबा अरबाइन’ खान्छन् ।
छठको दोस्रो दिन शनिबार दिनभर उपवास बसी राति खिर बनाई देउतालाई चढाएर व्रतालुहरू खान्छन्, यस विधिलाई ‘खरना’ भनिन्छ ।
त्यस्तै, छठको मूल दिन आइतबार अस्ताउँदै गरेको सूर्यलाई अर्घ्य दिइन्छ र त्यसको भोलिपल्ट सोमबार उदाउँदै गरेको सूर्यलाई अर्घ्य दिई छठ पर्वको विधिवत रूपमा समापन गरिन्छ ।